Este mércores, 21 de xuño, día que anuncia a chegada do verán, o xornal La Voz de Galicia achéganos unha información que nos enche de vergonza a todos os que presumimos de fisterráns polo mundo adiante.

Nada hai máis frustrante que abrir un xornal e atoparse con referencias negativas á terra de onde un é.

Por suposto non sempre é así. Por iso, ante o vandalismo, os que teñen algún tipo de responsabilidade municipal deberan facer algo máis que cobrar polas súas asistencias a plenos e comisións.

Como todo o mundo sabe, en Fisterra, patrimonio, o que se di patrimonio, non temos moito. E o que hai, deberiamos coidalo un pouco.

 Por desgraza, aquí, a conciencia patrimonial é a que é. E claro, así nos vai!

O pasado venres, o escritor, historiador e investigador Marcos Valcárcel asinaba, no xornal "Galicia hoxe", un extraordinario -e non menos interesante- artigo titulado Denuncias no reino do disparate.

Como é habitual nas columnas do brillante articulista ourensán, o artigo que nos ocupa é todo el unha revelación, clara e concisa, da situación actual do galego a respecto de determinados movementos que, nos últimos tempos, se están a dar por parte dalgúns "iluminados" que se cren a única autoridade do idioma patrio.

Como queira que a nosa lingua -a de todos- non é, nin nunca foi, propiedade de ninguén (partidos políticos, organizacións sectoriais afíns, etc), esta literaria casa súmase plenamente ás precisas e valentes argumentacións do intelectual ourensán e aproveita, co seu permiso, para reproducilas na súa integridade.

Conscientes do grande interese que o artigo de Marcos Valcárcel, a bo seguro, suscitará entre os lectores e lectoras do noso país, velaí vai: desfrutádeo, pois ilumina!

O Consello da Cultura Galega, a través da sección de literatura e industrias da edición, vén de publicar o segundo volume do proxecto Poetas e narradores nas súas voces, dándolle continuidade, así, ao primeiro libro, editado no 2001, e coordenado pola escritora Luísa Castro.

Nesta nova entrega aparecen poemas de dezaseis autores -representativos de varias xeracións- en palabras de Luís González Tosar, coordenador da publicación reseñada, a carón de catorce dos nosos máis destacados prosistas.

A nómina lírica fórmana Manuel Álvarez Torneiro, Víctor Campio, Arturo Casas, Modesto Fraga, Mª do Carme Kruckemberg, Antón Lopo, Xosé Miranda, Gonzalo Navaza, Román Raña, Cesáreo Sánchez Iglesias, Xavier Seoane, Xohana Torres, Dora Vázquez, Pura Vázquez, Helena Villar Janeiro e Miro Villar.

Grazas ao excelente labor de recuperación da memoria histórica desenvolvido polo Ateneo Republicano de Galicia, e froito das minuciosas investigacións levadas a cabo por un dos nosos máis grandes escritores nese eido, Luís Lamela García, contamos xa cun magnífico libro que ofrece nova luz a un dos capítulos máis escuros da nosa historia recente.

O volume de Luís Lamela, titulado Un monumento en el Campo da Rata. Razón y génesis, continúa maxistralmente anteriores entregas como Crónica dunha represión na Costa da Morte, Pepe Miñones, un crimen en la leyenda ou Foucellas. 

http://www.finisterrae.org/ tal e como anteriormente fixera La Voz de Galicia, faise eco da creación desta nova web na súa páxina principal. O Artigo di exactamente:   

NOVAS WEBS NA COSTA DA MORTE
A Costa da Morte conta con tres novos espazos en internet:

FESTASDOCARMEN.COM: diario dixital onde se poderá encontrar todo tipo de información referente ao Concello de Camariñas.

MODESTOFRAGA.COM: web do poeta fisterrán Modesto Fraga, un espazo onde se pode atopar a súa biografía, obra e novas culturais.

XALLAS.ORG: web adicada ao fútbol da Costa da Morte e que conta cun apartado onde se pode opinar sobre algún tema de interése social.

Ademáis en blogoteca.com acábanse de abrir dous novos blogs referentes á Costa da Morte, un dos cales pertence ao escritor Xosé M. Varela.

«Gracias a finisterrae.org e a todo aquel que de algún xeito
ou outro contribúa a expansión deste lugar web.
Alejandro Conde.»

O que son as cousas. A maior parte dos medios de comunicación escrita fanse eco hoxe, nas súas páxinas, da desaparición de Manuel Calo Marcote, Jurjo; un mariñeiro fisterrán, sinxelo e traballador, un home que, por esas casualidades da vida, por se atopar alí, naquel azaroso intre, pasou a se converter na imaxe por excelencia do fenómeno migratorio galego de mediados do século pasado.

Aquela instantánea, crúa e conmovedora, na que aparece chorando a carón do seu fillo Juan no peirao coruñés, inmortalizada para sempre nos anais da nosa historia máis amarga captáraa, con verdadeira mestría, a vella cámara do malogrado Manuel Ferrol, un mito da fotografía con maiúsculas, da mirada sempre atenta e delicada.

Arcadio López Casanova recolle o IV Premio de poesía Caixanova
Cun poemario que xira arredor dalgúns dos temas máis tratados na literatura universal: o amor, a morte, o exilio e o paso do tempo, chega unha nova entrega do poeta lucense Arcadio López-Casanova. Editado polo P.E.N. Clube de Galicia e por CAIXANOVA, este volume consolida unha colección, "Arte de Trobar", que chega xa ao seu oitavo título, e que conta con obras de autores clásicos no noso sistema literario como Ramón Cabanillas, Luz Pozo Garza, Antón Tovar e Xohana Torres á par de creadores máis novos pero cun prestixio notablemente consolidado como Xavier Seoane (Dársenas do ocaso) María do Cebreiro (Non queres que o poema te coñeza) e Román Raña Lama (As metamorfoses do túnel).

Está claro que con esta nova aportación, que mereceu o IV Premio de Poesía Caixanova, o catálogo poético impulsado polo P.E.N. de Galicia cobra, se cabe, unha maior dimensión xa que o poemario referido é o primeiro libro de poemas que o autor dos "Mesteres" publica despois de preto de vinte anos de silenzo poético.

O P.E.N. de Galicia entrega os VI Premios Rosalía de Castro

O pasado venres, os que tivemos a fortuna de asistir aos actos de entrega da VI edición dos premios “Rosalía de Castro” celebrados en Santiago de Compostela, acudimos gozosos a unha memorábel festa da palabra, un encontro no que a cordialidade entre escritores e escritoras das diversas linguas do estado demostrou, unha vez máis, que a convivencia entre os respectivos sistemas literarios peninsulares é unha realidade cada vez máis efectiva e afectiva. A ocasión, como é lóxico, foi de absoluta excepción. Os premiados, malia que resulte unha obviedade reiteralo, dunha altura certamente notábel: Agustina Bessa-Luís, polas letras portuguesas, Josep Palau i Fabre, polas catalanas, Arantxa Urretabizkaia, pola lingua euskera, e Isabel Allende pola escrita en castelá. Así, con nomes tan sobranceiros no panorama literario universal, non é de estrañar que o referido acto resultase de grande interese para o público asistente.